Ümumdünya Xeyirxahlıq Günü

Ümumdünya Xeyirxahlıq Günü

Noyabrın 13-ü Ümumdünya Xeyirxahlıq Gününün hər il qeyd olunması bir çox ölkələr üçün çox yaxşı ənənəyə çevrilmişdir. Bu tarix 1998-ci ildə Tokioda Ümumdünya Xeyirxahlıq Hərəkatının 1-ci konfransının açılış günü kimi seçilmişdir. Bu tədbirdə Avstraliya, Kanada, Yaponiya, Tailand, Sinqapur, Böyük Britaniya və ABŞ  nümayəndələri iştirak etmişlər.

 “Ümumdünya Xeyirxahlıq Hərəkatı” təşkilatı  bir il əvvəl, 1997-ci ildə Yaponiyada yaradılıb. Müxtəlif ölkələrdən olan xeyirxahlıq hərəkatının həmfikirləri və könüllüləri » bir bayrağı altında” toplanıblar. Bu təşkilat yorulmadan hərəkət edir və öz əməlləri ilə insanları xeyirxah işlər görməyə ruhlandırır. Bu gün xeyirxah, səmimi, nəcib bir iş görmək istəyən hər kəs onlara qoşula bilər. Üstəlik, Hərəkat iştirakçılarının əsas ünsiyyəti internet vasitəsilə baş verir. Burada onlar öz resurslarında xeyirxah işlərə dair ideyalar və onların həyata keçirilməsi yolları haqqında danışırlar.

Hərəkatın özünün “Xeyirxahlıq Bəyannaməsi” adlı rəsmi sənədi var. Orada deyilir: “Biz sadə insan mehribanlığını məmnun və mənalı həyatın əsas şərti kimi qəbul edirik və bu sənədlə Ümumdünya Xeyirxahlıq Hərəkatını yaratmağımızı elan edirik. Biz hər bir ölkədəki təşkilatlar vasitəsilə və dünya miqyasında şəbəkə yaratmaqla bir araya gəlməyə və daha mehriban, daha mərhəmətli bir dünya yaratmağa çalışacağıq”.

Məhz bu təşkilatın üzvləri belə gözəl bayram yaratmağı təklif ediblər. Ümumdünya Xeyirxahlıq Günü rəsmi olaraq Sinqapurda 2000-ci il noyabrın 18-də Hərəkatın 3-cü Konfransında təsis edilib.

Heç kimə sirr deyil ki, müasir yüksək texnologiyalı dünyada insani hisslər, mənəvi keyfiyyətlər getdikcə daha çox ikinci plana keçir. Odur ki, bugünkü bayram insanlara xeyirxahlığı xatırladır və müxtəlif ölkələrdə mövcud olan xeyirxahlıq hərəkatlarını birləşdirir.

Ümumdünya Xeyirxahlıq Gününün digər məqsədi dil və mədəniyyət fərqlərinə baxmayaraq, müxtəlif millətləri birləşdirməyə kömək etməkdir. Axı, yalnız səmimi xeyirxah əməllər və hərəkətlər əsasında orijinallığı və bənzərsizliyi qoruyub saxlamaqla qarşılıqlı anlaşma əldə oluna bilər.

Yaxşı işlər görmək inanılmaz dərəcədə sadədir. Yaxşılıq pulla ölçülmür, bəzən çox vaxt və səy tələb etmir. Sadəcə mehriban bir təbəssüm artıq möcüzələr yaratmağa qadirdir. Xeyirxah əməllər hər kəsin əhval-ruhiyyəsini yaxşılaşdırmaqla yanaşı, həm də rifaha yaxşı təsir göstərir.

Xeyirxahlığın sağlamlığa təsiri

Müxtəlif ölkələrin psixoloq və həkimlərinin araşdırmasına görə, hər gün xeyirxah işlərlə məşğul olan insanlar özlərini fiziki cəhətdən daha yaxşı hiss edirlər. Onlar həyatlarının daha ahəngdar olduğunu hiss edir, daha yaxşı immunitetə ​​malikdirlər. Yəni daha az xəstələnirlər və daha uzun yaşayırlar. Bütün bunlar hətta praktiki araşdırmalarla da təsdiqlənib. İnsan başqa insanlara yaxşılıq edəndə onun limfositlərinin səviyyəsi yüksəlir və qan damarları genişlənir. Bu, ürəyin düzgün işləməsinə səbəb olur. Beyin sakitləşdirici təsir göstərən, stressin təsirlərini neytrallaşdıran və depressiyanı yüngülləşdirən çoxlu miqdarda endorfin («zövq hormonları» kimi tanınır) istehsal edir.